А сега малку во природа. Посетете го Габровскиот водопад и одморете се покрај убавите глетки и свежиот планински воздух.

За ручек можете да отидете кај фамилија Костадинови во с. Габрово, кои ќе ви приготват вкусни традиционални јадења или пак во ресторантот „Подгорски Ан“. Што и да изберете нема да згрешите.

Во с. Банско, во близина на хотелот Цар Самуил, посетете ја Римската терма, доцноримско термоминерално лекувалиште од 3 и 4 век. Температурата на лековитата водa е 72оC. Доколку сте луѓе што сакаат нови и несекојдневни работи можете да пробате како атракција „јајце на бански начин“. Овде ќе ја видите и уникатната скулптурата на Меркур „заштитникот на патниците”, која е една од трите вакви скулптури во светот.

Уште пред да им се приближите на дрвените мостчиња и куќички кај Моноспитовското блато, окото ќе ви потоне во зелената шир. Погледнете и откријте го целото разнообразие од растенија и животни, птици и инсекти, тоа богатство од разновидна флора и фауна.

Во Босилово посетете ја Собата на стари артефакти и предмети изработени од Блатото. Има многу што се види...

И за крај, насладете си ја душата со убава македонска песна и со кршно оро. Членовите на КУД „Гоце Делчев” ќе ве вратат назад во минатото со познатото „Комитско оро“ и ќе ви ја доловат сликата на борбата на македонските јунаци за ослободување од турското ропство.